2017年04月07日 星期五
【呢度我睇嘅】拉脫維亞市長做直播 主子照亂入冇面畀
大家仲記唔記得呢位教授呀？
咪直播期間畀仔女亂入搶Fo，然後老婆好好身手咁入嚟救駕嗰個囉。雖然教授呢單嘢已經傳到係人都知，不過唔係個個都可以經一事蔡一智。學Do姐話dry，意外即係意料之外，做Live真係好容易有意想不到嘅事發生㗎！
好似呢位拉脫維亞市長咁，話就話係俄羅斯人，身為戰鬥民族有咩風浪未見過，就算個天花板冧落嚟都唔L驚，但原來有啲嘢係連戰鬥民族見到都要投降⋯⋯
毛毛講緊嘅之唔係主子囉！本來市長就氣定神閒咁喺個Office度接受緊訪問嘅，點知突然之間有個黑影出現咗，原來係主子大駕光臨呀！嗚哇，主子呀主呀，你行入嚟有咩貴幹呀？而家直播緊㗎，你走先啦好嗎！
「我入嚟飲啖水啫，唔使理我，你繼續啦喵。」
呃⋯⋯主子你咁搶眼，好難唔理你㗎啵⋯⋯連市長都唯有眼甘甘望住主子飲佢杯水，仲畀咗個好無奈嘅表情畀大家睇?。
「萬大事都要等朕飲完水先！市長都冇面俾呀～」
陰功豬，市長就唯有等主子飲夠水先伸手叫主子讓一讓開啦，但係主子連掂都唔畀市長掂下就自己走咗喇。
市長仲話有貓腦細喺Office就係咁㗎喇。不過市長又點會介意吖，話晒佢都係貓奴一名，家有兩個主子㗎！難怪喺個Office度會有貓啦～真係葡萄死一班貓奴打工仔呀！
連戰鬥民族嘅市長都畀主子俘虜，睇嚟貓星人一統天下嘅日子真係指日可待喇！
