唔少人細個嗰陣都會有些少暴力傾向嘅，例如拎鉛芯筆係咁戳嚿擦膠，仲有咬晒熊仔餅啲手手腳腳再食個身，最經典都係試下Barbie個頭同啲手手腳腳係咪可以抆得出嚟㗎囉～

你哋啲人呀，成日抆完人哋啲手腳就亂咁掉，好心你哋就跟台灣呢個妹妹學下啦！

起碼放入雪櫃保鮮呀嘛！睇戲都有教啦，肢解完點可以唔處理好啲手尾㗎？整人肉雞飽仔都唔係一次過整晒，要分幾次㗎嘛～一陣間變壞咗，食壞人哋個肚點算呢？

不過阿女咁玩法，阿媽打開個雪櫃真係當堂嚇一跳呀，阿女仲要好天真瀾漫咁問，乜公仔唔放得入雪櫃㗎咩？呃⋯⋯唔係唔得嘅。網友記得臨瞓前叫老公鎖起啲刀入櫃桶先呀下。

講到特別嘅玩玩具技巧，又點可以唔提呢個拎森林家族嚟煮飯仔嘅小朋友呢⋯⋯

人哋話生女係特別細心，睇嚟係真㗎！一個就拎森林家族煮飯之前記得除晒啲衫先，另一個就肢解完個公仔之後記得放入雪櫃，真係有手尾到呢⋯⋯好彩呢兩位妹妹一個喺台灣，一個喺日本，如果畀佢兩個相遇，真係不得了呀⋯⋯

封面圖片及資料來源：廖芷澐、43ismamorigami／twitter