為咗養寵物，你可以去到幾盡？通常阿爸阿媽都唔多贊成啲小朋友養寵物，特別係啲要特殊照顧嘅。你知啦，一陣小朋友冇心機養，咪又係變咗阿爸阿媽養～養個小朋友都咁難，仲要照顧多隻寵物，真係唔係個個父母都得㗎！

咁如果小朋友真係好有心機養，但係爸爸媽媽唔畀咪好慘囉？呢個時候就要睇下小朋友表唔表現到自己幾有誠意喇～

美國有個妹妹叫Britta，睇張相都同收容所嘅其中一隻貓貓一見鍾情呀！就係呢隻叫Justice嘅貓貓喇～Justice好慘慘豬㗎，兩隻眼受咗重傷，送到去收容所都已經保唔住對眼，而家完全睇唔到嘢喇。

但係Britta完全唔介意，仲話感受到Justice嘅呼喚，覺得自己就係被選中嘅貓奴呀！不過要養一隻全盲嘅貓比養普通嘅貓仲困難，又點會咁易過到爹哋媽咪嗰關呢～

為咗滾動阿爸阿媽，Britta就畫咗幅四格漫畫畀佢哋睇自己有幾愛Justice喇。雖然未見過面，但係Britta已經畫定同Justice嘅幸福毛文，又鼻貼鼻，又講晒I Love You咁，真係sweet到爆呀～最後Britta嘅父母都抵擋唔到佢嘅愛的攻勢，就帶Britta去搵Justice喇！

係命中注定嘅相遇呀！明明一貓一人之前都冇見過對方，但係Britta同Justice一見如故，妹妹仲開心到喊?呀！連收容所職員都話，Justice一見到Britta就冇晒戒心，又畀Britta摸又咁嗲Britta，真係好少見㗎！

一睇就知佢兩個係天生一對嘅小奴才同主子啦，仲邊有人忍心阻止佢哋一齊喎？於是佢哋就好似童話故事咁，快快樂樂咁生活落去喇～Britta仲幫Justice改咗名叫Lucky，意思係能夠遇上對方，係佢哋兩個嘅幸運喎。真係即刻想唱返首《小幸運》呀～

封面圖片及資料來源：The Dodo