細個嗰陣仲未有智能電話，啲零用錢又唔多，仲可以玩咩呀？咪自己諗辦法搵嘢玩囉～以前冇銀用，無聊起上嚟，喺街邊見到一條草都可以玩一餐㗎。草有咩好玩？識玩嘅話大把嘢可以玩呀！

蒲公英

夏天除咗為大地帶嚟美腿，仲係薄公英結果嘅時候，每次見到個白色毛毛球，都忍唔住想吹下佢，睇住啲種子隨風飄走，真係好治癒同好有文學氣息呀～再唱返首周董嘅薄公英的約定，係咪好浪漫呢？最緊要明明貪玩都可以講做幫啲蒲公英播種，懶係偉大咁呀嘛！

怕醜草

講到必玩嘅植物點可以唔講怕醜草㗎！無論三歲至八十歲，只要見到啲好似怕醜草嘅植物就會好有衝動輕撫下佢⋯⋯然後望住佢慢慢咁合埋，真係好治癒呀～其實係好無聊嘅，但唔知點解嗰陣就係覺得好好玩囉，玩到啲怕醜草合埋晒冇得玩仲會有少少失落?啵。

三葉草（咪即係少塊葉嘅四葉草囉）

細個一定試過冇嘢做走去望下有冇四葉草，仲要好天真好傻咁覺得搵到就有運行?！算啦⋯⋯毒L就係毒L，就算搵到四葉草都唔會好似大台啲劇咁識到可愛女女㗎⋯⋯

你以為咁就完？畀你估到就唔係毛毛啦，好多人都唔知三葉草其實可以拎嚟Battle㗎！玩法就係同個fd一人摵一棵，喺個莖尾慢慢摵，跟住就會淨返絲黐住塊葉。然後兩個人棵嘢互蹺，數三聲一齊拉，邊個條嘢斷先就邊個輸！講緊條三葉草嘅莖呀，你諗緊邊條嘢呀？

洋紫荊／宮粉羊蹄甲

區花都玩？咩啫，又唔係玩朵花，玩啲豆豆咋嘛～有冇人同毛毛一樣覺得佢哋好似荷蘭豆呀？不過就唔係拎嚟食，係拎嚟啪啪啪呀！摵兩塊豆落嚟，跟住就拎住個頭尾拍下拍下，啪啪啪啪啪咁，真係好痛快！邊個話毒L就冇得啪㗎？

竹

以前喺屋企樓下成日都見到啲阿婆圍住啲竹喺度摵，摵咩？原來喺竹枝個尖端生嘅新竹葉係捲埋一條咁，啲阿婆話摵落煲水可以清熱喎。毛毛有冇試過？傻西瓜嚟嘅，係都唔會自己試啦係咪？煲水就冇，不過那些年睇得武俠片多，咪學啲高手摵塊竹葉當笛吹㗎，吹唔響咁解咋嘛⋯⋯你識吹？你走啦⋯⋯毛毛唔想搞大件事呀。

不過，講起上嚟，上面講呢堆植物，有啲都唔似以前咁，生到周圍都係喇⋯⋯就算有，個個都掛住望住個電話，邊度會留意到吖？最緊要，我哋都已經唔再係細路喇⋯⋯

圖片來源：爆廢公社