有冇人同毛毛一樣，覺得世間上所有玩具同公仔都好似《Toy Story》入面嘅主角咁，係有生命、思想同感覺㗎？嗱，有就啱喇！咁你就肯肯定同毛毛一樣，一見到以下呢幾隻日本Docomo吉祥物「ポインコ」兄弟嘅公仔就好想拯救佢哋出嚟呀！

撞鬼咯！做咩一隻二隻「ポインコ」兄弟畀人吊住晒條頸㗎？家陣玩夾公仔定玩整燒味呀？唉，雖然佢哋個身黃黚黚，十足十燒味店啲油雞咁啫⋯⋯但其實佢哋唔係雞，係鸚鵡嚟㗎⋯⋯

大家睇下，條繩仲要箍到鬼死咁實喎，喂吊頸都要唞下氣㗎，毛毛隔住個mon都feel到佢哋有幾辛苦喇！唔怪得之發現呢部夾公仔機嘅日本網民都話呢部夾公仔機成個刑場咁款啦⋯⋯計毛毛話，呢個分明就係一個絞刑場！

嗱，唔好話毛毛唔提呢部夾公仔機嘅老細，你再唔放班「ポインコ」兄弟出嚟，小心佢哋嘅怨念好似呢隻比叉燒咁愈積愈多，第時返嚟搵你報仇呀⋯⋯唔講住，有冇人知部邊喺邊呀？毛毛趕住拎個銀包出嚟拯救佢哋呀！

今日ゲーセンで処刑場を見た pic.twitter.com/3vDjkxJOaN

— うりちこ 夏ｺﾐあんきら狂騒曲 (@urichiko) 2017年4月8日

資料來源：urichiko／twitter、masamasalee／twitter

延伸閱讀：

【比卡超真面目】人類，我會靜靜咁一直望住你…

【好強怨念】人類，我睥咗你咁耐仲唔放我出去？