Google Translate真係令人又愛又恨，特別係對啲想面向國際嘅小店嚟講，想tourist friendly啲寫齊八國語言喺自己個Menu度，咪自己Google囉～點知咁就出事喇！

搞到面向國際變7出國際，又何苦呢？不過，人類總是要犯同樣嘅錯誤嘅，就算網上流傳幾多Epic Fail嘅例子，咪仲係有大把人用～你以為得強國先係咁？就算妹豬最愛嘅日本都「尼龍嘥嘢」呀！

有台灣網友就諗住lun廚喺大阪食下好西，但係又唔多識日文，咁最好就梗係揀返間有中文Menu㗎啦～不過點解望落張menu硬係怪怪哋嘅？

300幾円一個飯有和牛咁犀利！但係咩叫其他碗呢下？咪住先，睇漢字「他人丼」咪即係普通牛肉溝豬肉飯加蛋咋喎⋯⋯說好的和牛呢？有嘅，唔喺你個碗啫，寫到明和牛(喺）其他碗囉⋯⋯

好一碗「天堂碗翻轉」！原來天堂興食碗面反碗底，好似巴黎鐵塔咁翻轉又翻轉嘅～長知識了！咁上枱嗰陣究竟會係碗面定碗底呢？

呢個經驗豐富嘅鱈魚子又係邊方面嘅經驗豐富呢？毛毛真係睇唔透⋯⋯

最精彩都係呢味「山藥你該驕傲」！真係見到都想唱「See me fly～I'm proud to fly up high～」呀～連網友都忍唔住要叫返碗呀，睇下你係咪真係咁值得驕傲！

不過等個麵嚟到⋯⋯真係忍唔住問一句，人做拉麵，你做拉麵，山藥你慚唔慚愧？你明明就只係一碗普通嘅山藥月見拉麵！你仲敢同我驕傲呀你！

其實Google Translate兩個字啫：認真你便輸了。翻譯呢家嘢，都係交給專業的來啦～

封面圖片及資料來源：rosen2061／PTT