只有鍾意夾公仔嘅人先會明白夾到公仔嗰種成功感。不過，家下呢個年代咁多無良老細，啲夾有咁虧得咁虧，啲出口有咁密實得咁密實，想成功夾到隻公仔出嚟真係仲難過叫腦細加人工⋯⋯

有見及此，最近有網民就決定「你做初一，我做十五」，用非常嘅手段嚟夾公仔！

冇錯，呢種非常手段就係利用磁石嚟控制部夾公仔機！

喺片段中，呢位網民用嚿大磁石一嘢吸住個夾，然後再控制個夾去佢想夾嗰個公仔度⋯⋯話咁快，佢就成功夾到個公仔出嚟喇！只要有咗嚿大磁石，天下間仲有邊隻公仔我係夾唔到呀？

btw，你諗到用磁石嚟夾公仔好叻咩？好幾年前台灣已經有人咁做啦，條友仲畀人斷正兼上埋新聞?⋯⋯溫馨提示，雖然用磁石嚟夾公仔真係幾work，差唔多百發百中咁滯，不過假如大家唔係想畀老闆斬咗對手嘅話，毛毛建議大家就唔好學呢位哥仔咁玩法嘞。

資料來源：小奶球／微博、twgossiping／YouTube