講起女神，好多人第一時間都會想像到一個頭髮長長兼心地善良嘅靚女⋯⋯喂，家下咩年代呀？一定要長頭髮先靚㗎咩？而家好多女仔都剪短頭髮嚟表現自己清爽可愛嘅一面啦！做人嘅嘢，最緊要都係有自信啫！

嗯，雖然講係咁講，不過無論長定短，做女仔嘅，始終都想有把靚靚嘅頭髮嘅⋯⋯

呢個外國小妹妹Gianessa都唔例外，一樣好想要把靚頭髮，可惜佢年紀小小就有俗稱「鬼剃頭」嘅脫髮問題⋯⋯睇住啲頭髮一撮一撮咁甩落嚟，真係見到都戥Gianessa心悒。好彩，Gianessa識得依然笑住咁去面對！真係好叻豬呀！

而到咗學校一個好似冇佢份玩嘅日子－「Crazy Hair Day」，Gianessa嘅媽咪仲幫佢諗咗個比戴假髮好嘅計仔，就係用閃石貼紙幫囡囡設計一個獨一無二嘅造型喇！

嗱，睇見Gianessa笑得咁開心就知佢幾滿意啦！又有花，又有貓頭鷹呀咁，最重要係有媽咪幫佢逐張逐張黐啲貼紙上去吖嘛，張張都充滿住媽媽嘅愛㗎！

Gianessa嘅媽咪話喎，希望Gianessa可以好似啲閃石一樣咁耀眼，同埋可以同其他同學仔一樣咁享受呢個「Crazy Hair Day」～

老老竇竇，其實冇咗頭髮咁又吖？妹妹咁有自信，又有心思，再加上呢個咁甜美嘅笑容，淨係咁樣已經靚過好多人啦～係咪？

封面圖片及資料來源：daniellawride／Instagram