有樣嘢真係諗極都唔明，日本傳說明明講到河童好得人驚，不過睇親卡通片，入面啲河童都只係一隻揹住龜殻嘅禿頭大叔咋啵，仲要成日都傻豬豬咁整唔見頭頂隻碟啲水，搞到軟過軟雪糕，冇晒抵抗力呀！

都係你哋啲人啦，畫到河童成個傻仔咁，破壞晒佢嘅形象～其實人哋好兇猛㗎！唔信，家下就還原真相出嚟畀你睇！

嘩！好似啲青蛙畀人剝咗層皮解剖咁呀！咩話，你話呢隻係吉祥物！邊忽吉呀？?仔咪混吉啵！

原來呢隻係日本兵庫縣嘅河童吉祥物「河次郎」，當地見度度啲吉祥物都係sell可愛，咪諗住特別啲，跟足傳說整隻超擬真河童，咪一定可以製造話題囉～

咁都畀你諗到，果然創作力量同幻想會嚇你一跳呀下 。不過，最估你唔到都係呢隻河童居然真人化，仲喺賞櫻祭典度周圍行，Sell人買咖喱呀！

「咖喱好好食㗎！吼！」 

喂，老老77，阿河童大哥，見到你呢副尊容，唔好話小朋友呀，大人見到你都走夾唔唞啦！仲點敢買咖喱呀？

「Hi Auntie！」

雖然河次郎行埋去只係just to say hi，但係你睇下Auntie個樣幾驚先得㗎，就連隔籬個妹妹都嚇到喊咁口呀⋯⋯

河次郎你又唔使咁傷心嘅，樣衰冇罪㗎～Between，你賣嗰隻咖喱其實賣相都唔差吖～仲有三粒蛋咁得意嘅？原來係因為河童好鍾意「尻之玉」（傳說肛門入面有粒珠），所以咖喱都要放返幾粒落去喎。呃⋯⋯呢兜嘢，都係唔好預我喇⋯⋯

封面圖片及資料來源：j-cast、自由時報