雖然清明節就過咗一排，不過拜山嘅嘢唔一定要正日先拜得嘅，唔少人都會揀清明節前後去，貪冇咁多人，有咩想同先人商量都方便啲呀嘛！而講到拜山就梗係唔可以兩手揈揈，起碼都要有車有樓有iPhone啦！之但係，原來好多人燒車畀先人嘅時候都忘記咗一件事㗎喎⋯⋯

就係冇記得燒埋個車位呀衰仔！你哋睇下，所以而家咪搞到先人喺下面遊完車河搵唔到位泊，局住上嚟泊住先囉（好似係）⋯⋯吖，唔知啲咪錶收唔收陰司紙㗎呢？

btw，好彩呢架藍色普通房車都唔算好大架，阿Sir見到都仲可以側側膊扮見唔到就算，但如果係呢架一比一林寶堅尼嘅話，阿Sir見到就真係唔知抄唔抄你牌好喇⋯⋯

唉，成日話有錢使得鬼推磨，原來連做鬼都有貧富差距。大家睇真啲，呢架紙紮林寶堅尼入面仲要有埋賽車seat位，加上啲色又襯到絕一絕，呢啲咪叫做孝義永在心囉！嘩，架價值三萬蚊嘅紙紮林寶堅尼果然夠晒堅呀下！

封面圖片及資料來源：歐陽雅各、星洲網