唔知有冇人發覺，通常老師同校工叔叔姨姨個樣睇落都比佢實際年齡後生啲㗎呢？可能係因為對得年輕人多，所以心境都young啲呀！想搵份對住後生仔、小朋友嘅工，又唔一定要喺學校做嘅，做卡通人物博物館，成日見到咁多小朋友出出入入，一定個人都輕鬆啲、有童真啲啫～

自從有咗FB之後，唔使去到日本都知當地嘅櫻花開咗未啦～神奈川縣川崎市嘅叮噹博物館（藤子・F・不二雄ミュージアム）都唔例外，開滿粉嫩粉嫩嘅櫻花呀～

櫻花會開，當然都會落啦～一地都係花瓣，冇理由唔掃一掃佢嘅，不過叮噹博物館嘅員工就唔係一嘢掃乾淨晒，而係砌咗個心心出嚟啵！掃地都掃得咁有心思，一定係因為平時睇得多叮噹喇！

圓圈加一點～圓圈加一點～下面畫枝波板糖再畫個呼拉圈！咦，叮噹嚟喇！原來之前叮噹博物館嘅員工都試過用落葉砌叮噹出嚟㗎喇，砌得咁靚，有冇問叮噹借法寶出貓㗎先？

喺特別多落葉同花瓣嘅季節就要忙住掃地吖，咁唔知平時班員工唔使掃地嘅時候，開會係咪討論「叮噹對大雄的成長利多於弊」㗎呢？

封面圖片、資料來源連結：fujiko-museum

同場加映：

【巧打耳】用落葉嚟砌小熊維尼會唔會太強大？

睇老師用落葉砌小熊維尼好似好易咁點知自己整就…