小朋友玩玩具嘅方式有好多種，但唔係樣樣都啱畀爹哋媽咪睇到㗎。平時睇戲成日講到啲小朋友又不老症，又畀魔鬼附身咁，現實邊得嚟咁多呢啲嘢吖，小朋友係天真無邪又純潔㗎嘛～應該係嘅應該係嘅⋯⋯

之前介紹過一位好有解剖天份，又好好手尾嘅妹妹，佢玩公仔嘅方法就係肢解完啲公仔再放入雪櫃，真係嚇到阿媽心都離一離呀⋯⋯玩咩公仔呀，玩啲正氣啲嘅嘢咪唔怕囉！一於玩麵包超人啦！

日本網友就係以為麵包超人咁益智，好啱小朋友玩，但原來都係睇人㗎咋⋯⋯

喂！方包超人，你唔落得水㗎！麵包索咗水會變成一pat嘢㗎！其他人做咩唔救佢，仲一齊伸出對手圍住佢，露出個詭異嘅笑容⋯⋯莫非喺度進行緊啲咩黑魔法儀式！

睇下方包超人個樣，直頭撞邪咁呀！兩眼放空咁喺度笑，真係笑到你心都寒埋呀！

冇嘢係上網check唔到嘅，有網友即刻提供咗呢個極黑暗嘅魔法儀式例子⋯⋯傳說只有深仇大恨到好似竹筍村同香菇山咁，先會用到呢個咁殘忍同可怕嘅獻祭儀式㗎⋯⋯

嗚⋯⋯咁方包超人做錯咩呀，搞到一班麵包朋友咁對佢呀？定係囝囝畀細菌大王附身，所以做啲咁暗黑嘅嘢呀！快啲搵驅魔人啦！

其實會唔會係你班人諗多咗呢？睇戲都有教啦，食西餐飲湯都係咁掉塊麵包落去㗎啦，囝囝都係想碗湯冇咁熱啫，55，一定係！你知啦，有啲嘢都係唔好知得太多⋯⋯

封面圖片及資料來源：廖芷澐、varatoril／twitter