返工要OT同畀腦細鬧都夠慘啦，更慘嘅係要幫豬一般嘅隊友或者上司執sss呀！執sss呢種厭惡性工作，除咗自己主子嗰啲之外，正常都唔會想幫佢執啦⋯⋯偏偏呢個世界真係有啲不負責任嘅人，該執嘅sss自己唔執，留返等人哋執㗎啵！

咪臭係講緊啲由得狗狗四圍便便又唔執嗰啲狗主囉，你估啲便便真係黃金咩⋯⋯搞到成地都係茄，真係多L謝你呀！

喺英國一個小鎮就有好多呢啲衰狗主，搞到一街狗屎。而喺嗰度住嘅Steven大叔就係受害者喇，佢本身行動不便所以出入要用電動代步車，但係次次返屋企都要清轆上面啲狗屎呀陰功！

終於有一日Steven叔忍唔住要出手喇！佢居然親自四圍去執屎，實在太偉大喇！一係唔執，估唔到一執，一日都有差唔多50包呀！

為咗畀啲狗主睇到自己有幾過份，佢將啲一包包嘅便便集合一齊，仲寫埋告示畀啲狗主睇，點知班人講極唔聽，咁就唯有用其他方法啦！

Steven叔試過用噴漆大大隻字寫喺便便收隻箱下面，等啲人唔好話睇唔到。又試過標示畀人睇喺邊度執到便便。咁激？其實Steven叔用嘅係水溶性油漆，所以用水一沖或者落雨就冇㗎喇，況且有得揀，佢又點會想咁做吖？

咪以為好人實有好報，有啲狗主覺得佢多管閒事，仲寫信恐嚇佢?呀！最慘嘅係連政府都出咗張良好行為協議（Acceptable Behaviour Contract ）要佢收手唔好再做呀⋯⋯好彩有團體睇唔過眼，發起聯署幫佢咋！希望真係幫到Steven叔啦⋯⋯Btw，如果喺香港執，唔知有幾多真係狗屎呢下？

封面圖片及資料來源：Metro