日本岡山縣有咩玩？去岡山縣，除咗可以參觀日本百大名城之一嘅岡山城同日本三大名園之一嘅岡山後樂園之外，唔少遊客都鍾意去倉敷市嘅美觀地區。而最近，正正就有間位於倉敷市嘅cafe畀日本網民熱推嘞！一齊睇下～

呢間cafe叫「西洋乞食」（註：此乞食非彼乞食）。呢度嘅裝修偏向懷舊風，牆身掛咗唔少擺鐘、相架、擺設，仲有好多用嚟影照街裡一對蚯蚓嘅煤氣燈呀咁，真係好有feel呀！呢啲咁有情調嘅環境要嚟拍拖或者同朋友傾下計就最啱㗎嘞～

嗱，網民熱推得嘅就當然唔會淨係因為裝修靚咁簡單啦，其實以下呢杯玫瑰花雪糕梳打先係「西洋乞食」畀網民熱推嘅真正原因！

玫瑰花形狀嘅白色雲呢拿雪糕加上藍色嘅梳打水，淨係視覺上已經係一大享受，擺埋落口嘅話更加係涼透心，啱晒而家咁熱嘅天氣飲呀！

另外順帶一提，玫瑰花雪糕除咗可以配梳打之外，其實仲可以配咖啡㗎啵。（不過如果用嚟呃Like嘅話，咁就梗係梳打水靚啲啦～）

雖然「西洋乞食」唔係喺正美觀地區，不過距離美觀地區都唔算好遠。由水島臨海本線嘅倉敷市站搭過去都只係20分鐘左右，跟住喺榮站落車行5分鐘就到㗎喇！

喂，啱feel嘅咪排埋佢入行程囉。

美しすぎるクリームソーダを飲みに岡山来た pic.twitter.com/eFmmIhbDKj

— あのね (@ano_ne25) 2017年4月12日

資料來源：ano_ne25／twitter