2017年04月14日 星期五
熊本縣推出食得嘅榻榻米味筷子？
知唔知煮嘢食最煩嗰樣係咩呀？煮嘢食最煩嗰樣唔係煮嘢食，係煮完要洗碗嗰下呀！唔洗碗又畀阿媽媽叉，但下下用即棄餐具又嘥錢兼唔環保喎⋯⋯你哋話，如果所有餐具都可以食得落肚咁幾好呢？
繼早前有人發明咗食得嘅外賣盒同咖啡杯後，最近日本熊本縣都推出咗一款食得嘅筷子。
話說，日本榻榻米嘅原材料多數都係由熊本縣出產嘅。有日生產商就忽發奇想，諗到用榻榻米嘅原材料嚟整筷子，於是一款食得嘅榻榻米味筷子就咁就出咗世喇！吖，就咁睇對筷子就好似兩條餅乾條咁，唔知食落口係點榻榻米味法呢？
另外，聽講呢款筷子仲含有豐富嘅膳食纖維，食一對筷子就等於食咗一碟沙律咁話喎⋯⋯嘩嘩嘩，係真唔係呀？咁嘅話，咁毛毛距離脫離便秘苦海嘅日子咪不遠矣？！
【網民實測】
而喺前日，有日本網民已經買到呢對榻榻米味筷子，仲即刻用佢嚟食嘢?！不過呢位網民試用完就表示唔太建議大家使用，話有「謎の喪失感」喎⋯⋯到底榻榻米味筷子用落同食落係點？咁就要留待大家去日本嘅時候慢慢發掘嘞。
