唔少旅遊景點都會設置一啲打卡紙板喺度畀遊客影相留念（即係有個窿畀你塞個頭入去嗰啲呢）。雖然毛毛明白塞個頭入塊打卡紙板度影相呢個動作係有少少⋯⋯不過你哋唔影啫，呢個世界上仲有大把人鍾意影㗎嘛！

最近，富士山一塊打卡紙板就畀網民瘋傳，話呢塊有可能係世上最難影嘅打卡紙板喎⋯⋯

喂，你塊打卡紙板個人頭位唔好再低啲！家陣塊打卡紙板個人頭位差幾cm就掂到地下，而且塞個頭入面嘅時候仲要下巴向天先啱位⋯⋯想影嘅話，咪要倒立或者瞓喺地下度先影到？

想影呢塊打卡紙板唔一定要倒立或者瞓地嘅，用欣賞「天橋立」嘅甫士都一樣影到！登櫈，有網民就畫咗呢幅概念圖畀大家睇，點樣可以影到呢塊打卡紙板嘞～

雖然有網民教路之後，張印咗日本鬼嘅打卡紙板的確係易影好多，不過計毛毛話，搞咁多嘢做乜吖？好似上面呢張打卡紙板咁咪幾好！唔使出樣，隔籬又有埋條女喺度⋯⋯嗯嗯。

資料來源：chip_potekko／twitter、MicroSwitoo／twitter、goukun12359／twitter