2017年04月18日 星期二
【回不去了】到底要幾為食先會睇咗隻喵星人做炸蝦？
阿公阿婆嗰代，生活環境冇咁富庶，乜都要慳住使，不過而家就唔同喇，大家畀得起錢，咪成日轉新款囉，所以落街行個圈，隨時執到人哋掉出嚟嘅雜物㗎，唔好以為人哋唔要嘅實係垃圾喎，其實多數都好新淨，上一季嘅衫又有CD又有傢俬都有，識得執，真係乜都有得執㗎！
雜物就話週街都有得執啫，估唔到炸蝦都會隨街跳喎？邊個咁大懵，跌咗咁大隻炸蝦出嚟都唔知呀？仲要跌喺車底，真係相當有嫌疑呀下……
咦，唔係喎，行近幾步睇真啲，原來擺咗個大烏龍，唔係炸蝦嚟㗎，係瞓緊覺覺豬嘅喵星人先真呀！佢收起咗對手仔，對腳仔又疊埋一齊擺，遠睇又真係幾似天婦羅嘅！
到底要幾為食先會睇咗隻喵星人做炸蝦呢？有網民仲要將呢隻瞓到連自己畀人笑緊都唔知嘅喵星人key咗落碟炸蝦度，唔得喇！我濕曬喇個口，真係好想咬返啖呀！
喺奴才眼中，當然只有自己最錫嘅喵主子或者汪主子啦。咁喺好為食嘅奴才眼中呢？咪就係好似串燒嘅主子囉……又天婦羅又串燒，呢個post真係好熱氣呀，冇咩毛毛都係出去飲返啖水先！
お前、エビフライみたいなネコだな。 pic.twitter.com/wc02uJ3r6p
— 小豆涼:借0/184:葬0/100 (@azukiyukari) April 16, 2017
封面圖片、資料來源連結：azukiyukari／twitter
同場加映：
