少年，你以為食飯叫少飯、食肉走肥膏、食炸雞忍痛唔食塊雞皮，就可以成功減肥，迎接陽光與海灘喇咩？你真係太天真，其實肥咗成個圈，仲有個幕後黑手，就係糖份呀！平時飲埋飲埋咁多果汁呀奶茶呀汽水呀咁，飲嗰時就爽，但佢哋好高糖份，飲得多好易肥㗎傻豬！

好彩而家啲飲品包裝上面都有個營養標籤，可以睇到佢含糖量乜乜物物之類有幾高，啱曬關注健康人士呀！雖然多數買之前都唔會睇，不過十次都有一次會想扮曬健康望幾望嘅……咦，如果撳汽水機咪睇唔到啲飲品個營養標籤囉？

日本一間醫院可能就係知道呢個漏洞，所以特登寫低含糖量喺memo紙，再貼喺汽水機上面畀病人參考呀！好似呢支汽水咁，寫住「17杯分」，「1杯分」即係3g，咁呢支汽水就有成51g糖喇！

黃色memo寫嘅係含糖量，而綠色memo寫嘅就係鉀含量喇。最左嗰罐黑啡寫住「1／3」，即係佢嘅鉀含量大約等如三分一隻香蕉咁多呀～

聽講呢間醫院主要接收糖尿病患者嘅，所以咪特別緊張病人吸取嘅糖份同鉀囉～醫護人員做平常嘅工作都已經忙到踢曬腳啦，仲特登寫memo貼喺汽水機，真係好為病人著想呀！

知人が入院している
病院の自販に貼ってあった････

さとう小さじ１杯→３㌘
･･･計算したら飲む気うせた???

病院側の思惑にハマった( ；∀；)ﾁｰﾝ pic.twitter.com/s1mFfD2RDm

— 姫にゃ (@himenya299) April 14, 2017

封面圖片、資料來源連結：himenya299／twitter