如果問外國人對香港人有咩印象，一定係「成日都攰到狗咁」、「行路同講嘢都好快」、同埋「冷漠」喇。好多人都覺得香港人好cool，好似話冇乜面帶微笑、見到搵緊路嘅遊客都好少會主動上前幫手咁。有人話一個城市發展得愈快，人情味就會消失得更快，到底係唔係㗎呢？毛毛唔直接答你，用最近喺大埔發生嘅一件事嚟答你。

話說讀緊大學嘅Ivy早兩日喺大埔落樓梯嘅時候唔小心拗柴，成個人坐左喺地下，痛到企唔到身，好彩有路過嘅一對年輕男女同埋一位太太即刻上前扶佢去隔籬間茶記度坐一坐，仲問人攞咗包冰畀佢敷腳先走。

Ivy坐喺茶記嘅時候，有對本身食緊嘢嘅夫婦見到佢隻腳愈嚟愈腫，就話不如扶佢去睇跌打，仲話如果佢行唔到，車佢過去都得?！咁啱呢個時候Ivy個男朋友就趕到，所以就由男朋友同太太扶去跌打館喇。

可能好多人都覺得兩位街坊扶咗Ivy去睇跌打已經夠曬好人，但係呢對好心夫婦竟然仲幫佢畀埋$260醫藥費先走呀！如果係佢哋撞跌Ivy所以要賠醫藥費就話啫，但佢哋竟然堅持唔收返Ivy錢，仲叮囑佢要盡快睇好隻腳，真係心地好到成個天使咁呀！最後，Ivy仲將呢份無私嘅助人精神傳揚開去，將$260捐咗畀「香港特殊學習障礙協會」，延續呢兩位好心人嘅善心同愛心～

毛毛同Ivy傾話，佢話有希望同喺今次拗柴事件中向佢伸出援手嘅五位大埔街坊講以下說話：

封面圖片、資料來源連結：CHOW IVYSHuEN／Tai Po大埔