話都冇咁快，4日嘅復活節假期就已經遠離咗我哋喇嗚嗚……講起復活節，除咗放假去旅行之外，你仲會諗起啲咩吖？畀啲童真嚟啦，係復活蛋呀！你估個個都有錢紅日嘅時候飛咩，都係喺屋企食下朱古力，玩下復活蛋算罷啦。

外國就好興同小朋友玩找尋復活蛋遊戲，將啲復活蛋收喺屋企或者花園，再等班細路搵餐飽嘅，最近有個網民就咁啱搵返隻好耐以前阿爸阿媽收起嘅復活蛋喇！有幾耐？之唔係2008年嘅囉，嘩，數一數手指，即係足足成九年前喎！佢話阿爸阿媽2008年嗰時就擺咗啲傢俬喺士多房，呢排竟然喺個咕?後邊搵到隻復活蛋呀！

嗯，2008年雨水充足，陽光普照，葡萄豐收（ok其實唔關事），呢隻復活蛋經過年月嘅洗禮，一定比當年更加成熟有韻味……一於就劈開佢嚟睇下啦！

嗚呀！！！係發曬黴，有白色一點點嘅黑色蛋呀！

可能你心諗朱古力復活蛋擺得耐最多咪唔食得，使唔使咁大反應呀？咁諗你就錯曬喇，毛毛必須要強調，呢隻係真雞蛋嚟㗎！平時啲烚蛋擺三日唔食都一陣臭屁味啦，而家擺足九年，你話會係幾大陣臭屁味呢！唔講住喇，隔住個mon都覺得有陣味攻緊出嚟咁呀，毛毛都係去搵個防毒面罩嚟戴一戴先！

封面圖片、資料來源連結：Reddit McReddit／YouTube