現代人唔好話抽時間陪小朋友玩吖，小朋友得唔得閒陪你玩都成問題呀！話晒一日咁Full Schedule，放學又要補日文、俄文、實用文，又要學搖鼓、太鼓，非洲鼓，返到嚟做完功課寧願瞓多陣同打多陣機好過啦，仲邊得閒應酬你呀？

所以而家做人阿爸阿媽真係甚艱難，就算想囝囝陪下你玩啲益智遊戲，都要絞盡腦汁先可以喺電話身邊搶佢返嚟呀！

外國呢個阿爸，為咗引個仔陪佢玩尋寶遊戲，認真製作咗尋寶地圖同其他線索，借啲意畀囝囝搵到，再叫囝囝動動腦又轉轉彎，搵出收埋喺屋企附近嘅寶藏！

首先就由摺紙開始！原來將右上角張紙跟住條線摺埋就會見到係咩字㗎喇！「Under Step」即係樓梯下面啦～GoGoGoGoGo！

又係紙？今次又玩咩呀？除咗一截地圖，就係一張有漩渦圖案嘅紙，背後就有堆英文字母，好似人哋玩碟仙咁。唔通叫你諗唔掂就用碟仙問祖先？

哦～原來仲有道具嘅～畫個圈就搵到要咩字，今次輪到「Front Bush」喇～

喺前園又搵到幾張紙，天呀！究竟仲要搵幾多張呀？一張就有兩把劍，另一張就好多窿⋯⋯謎底已經解開喇！啲窿一定係用係有字嗰張嘢度嘅！

咁易畀你諗到答案就唔係解謎啦，原來仲要用埋一開始個個漩渦鐵片呀！配對啱先揀得啱字㗎～

最後就喺樓梯底搵埋淨低嗰塊地圖，咁個寶藏究竟喺邊呢？

原來就係你！只要跟指示放埋有兩把劍嗰張紙上地圖就搵到㗎喇！咦，寶藏就喺屋企隔籬咋喎，仲唔快啲掘？

成個遊戲又要用腦又要跑嚟跑去，其實都幾攰㗎，不過囝囝玩得不知幾開心，仲要自己落手落腳掘個寶藏出嚟?呀！

雖然呢個寶藏只係一堆普通銀仔，但係對於囝囝嚟講，爸爸願意花咁多時間準備，又陪埋佢一齊去搵，呢個遊戲本身已經係一個寶藏啦～囝囝咁細個就叻仔，第時出海去搵One Piece都肯肯定冇問題呀！

封面圖片及資料來源：thiswayandthatway／imgur