返咗學嘅時候畀阿媽偷睇日記，或者沖緊涼嗰陣畀阿媽偷睇電話呢啲事，相信唔少人都經歷過。養兒一百歲，長憂九十九呀，有時做仔女嘅，真係唔好嫌阿媽長氣呀，就算仔女幾多歲都好啦，喺阿媽心目中都係長唔大嘅小朋友嚟，最擔心就係佢哋群埋晒啲死臭飛，行錯路差錯步！

阿仔收收埋埋做曳曳嘢，阿媽都隻眼開隻眼閉啦，而家大大支針筒擺喺屋企個微波爐上面算點先？Take嘢仲咁光明正大，睇嚟真係high大咗喎！阿媽見到梗係第一時間問阿仔發生咩事啦！

唉，阿媽你有所不知喇，而家出街食嘢，同朋友見面傾計或者啲食物本身好唔好味原來唔係最重要㗎，啲食物嘅呃like能力先係重點嚟！好似去食糖水咁吖，芝麻糊黑鼆鼆咁，影起上嚟邊吸引㗎，嗱，識揀一定係揀新式甜品，夠晒colourful，影相靚呀，仲唔相機食先？

真相只得一個！原來啲針筒係雪糕裝飾嚟㗎，而家好興將醬汁裝喺針筒入面，等客人食嘅時候先按自己口味唧落雪糕度食㗎，阿仔話覺得個針筒幾得意，咪拎返屋企洗乾淨佢留念囉，估唔到竟然會嚇親媽咪！好彩佢有相機食先咋，唔係都唔知點解釋呀今次！

封面圖片、資料來源連結：陳祁諺／●【爆廢公社】●