唔知大家仲記唔記得呢？早前日本一間地鐵公司為咗令乘客唔會狗衝落月台，所以特登喺樓梯底整咗幅地陷3D畫，諗住啲乘客以為月台穿咗個大窿就會嚇到個心離一離，行都行得慢啲，連意外都少啲咁話喎⋯⋯

雖然呢條橋幾有創意，不過咁樣都好易出事㗎啵⋯⋯而家個月台冇人就梗係望到幅畫啦，但平時多人起上嚟分分鐘落到底先見到幅畫㗎嘛，萬一啲人落到底先突然煞掣，咁後面啲人又煞唔切掣咪弊？所以話，嘢可以亂食，畫真係唔可以亂畫！

而最近，有台灣網民都喺某個停車場入面發現咗幅海景公路畫。

嘩！雖然平時啲停車場裝修好單調，冇乜色彩啫，但你想美化個停車場都唔使加幅海景公路畫喺幅牆上面呀？畫入面條公路好似同個地面連接住咁，你想玩死啲眼殘傻西瓜咩？

真相永遠只有一個！有網民就推測，呢幅畫應該係汽車維修公司叫停車場嘅人畫喺度嘅！嗯，呢個世界果然好黑暗呀下⋯⋯

資料來源：Geda_2／twitter、許斯文‎／爆笑公社

睇埋：【心都離一離】整幅3D畫喺度咪唔驚班乘客狗衝落月台囉！