呢排天氣開始熱返喇喎！如果女神上嚟屋企嗰陣，整返杯精心炮製嘅夏日特飲畀佢，咁仲唔加分？不過作為一個麻甩仔，屋企雪櫃最多咪得青島，呢啲男人嘅浪漫，女神實睇唔上眼㗎啵⋯⋯

整特飲啫，唔使用劍嘅，用雪糕咪得囉！聽阿媽講，佢哋細個飲嗰啲咩「黑牛」、「白牛」都係?嚿雪糕落汽水度咋嘛，咁嗶雪糕落啤酒應該都得㗎啫？再同佢改返個英文名「Ice cream on the啤」，咁咪夠晒high囉！btw，咁揀咩味雪糕好呢？

日本網友就揀咗今個月喺日本新出嘅薑汁汽水雪糕，再加埋麒麟啤，睇下會唔會變薑啤咁話喎！喂，通常呢啲新嘗試都有啲伏㗎喎⋯⋯

由於時間嘅關係，特飲就完成咗喇。雖然個賣相就唔係話好靚仔⋯⋯（講緊杯嘢飲咋），但係網友就話個味道唔錯喎！夠晒Refreshing～簡直就好似隻雪糕牌子咁，爽呀！

其他網民見佢飲得咁開心，即刻大手入貨，仲買埋唔同味道嘅酒嚟做實驗?～果然好有求知精神呀下！睇完係咪好想自己整返杯飲下呢？冇薑味雪糕？咁咪整返杯本土特飲「黑牛」（朱古力雪糕加可樂）飲住先囉！

封面圖片及資料來源：kumakumataki／twitter