如果家人不幸遇上意外成為植物人，唔少人都會好傷心、悲觀面對，但係泰國有個爸爸就相反，非常積極咁面對喇。

2013年9月某一日，爸爸帶埋當時6歲嘅囝囝Ekkiu一齊去婆婆屋企食飯，點知囝囝突然哽親，送到醫院之後更加停止心跳。經過一輪搶救，囝囝終於回復心跳，不過就昏迷咗三日，醒返之後因為腦部缺氧時間太長而變得全身僵硬、眼神散渙、亦都失去說話能力，成為植物人。爸爸於是辭去工作，一心一意照顧囝囝。

囝囝遇上咁不幸嘅事，點解爸爸仲有心情扮鬼扮馬玩cosplay？原來佢咁做唔係想扮佢同鄉lowcostcosplay，而係想搏囝囝一笑。雖然囝囝大部份時間都冇咩表情，但係間中見到爸爸嘅趣怪樣，都會微微一笑嘅，而做爸爸嘅，就係為咗呢一個小小嘅舉動而努力喇。

呢位爸爸認為雖然我哋冇辦法回到過去，但就可以改變未來，除咗想令囝囝感受到歡樂，佢仲希望網民睇到佢嘅相之後，可以畀佢嘅積極樂觀精神感染，珍惜現在同未來。

扮灑鹽大師又有、扮女人又有、底橫加M巾笠落個頭扮鹹蛋超人都有，呢4年嚟，爸爸為咗囝囝真係出心出力㗎。

​

照顧囝囝嘅起居生活之餘，仲要出盡法寶扮鬼扮馬，真係一啲都唔容易，不過可以見到囝囝呢個眼神同笑容，相信爸爸一定覺得付出幾多都係值得嘅。

封面圖片、資料來源連結：น้องอิคคิว、星洲網