早前城城岳父一句「我從小就聽你的歌長大的」，真係道出咗唔少八、九十後嘅心聲！其實陪住我哋大嘅又點止得四大天王嘅歌呀，佢哋拍嗰啲戲都一樣「曾伴渡過漫長的歲月」㗎～

四大天王拍嘅笑片你又睇過晒未？TBB播嚟播去都係嗰幾套，其實仲有好多滄海遺珠都唔係好多人睇過㗎啵！

郭富城－千面天王

呢套基本上好少翻播，入面除咗有城城，仲有吳孟達達叔同埋當時仲紅緊嘅愛國倫，加多兩大美人張曼玉同邱淑貞?。最正嘅就梗係睇Aaron同達叔一齊反串著校服扮學生妹捉色魔啦，真係殺死人呀！

毛毛最印象深刻嘅，就係劇情設定張曼玉一見到圓形嘢就會發姣，所以成間屋連橙同可樂都係方形，細個以為係拍戲先有啫，直到毛毛大個見到方形西瓜之後⋯⋯呃，都係冇嘢喇。

冷門指數：4粒星

毛毛9選對白：「玩遊戲機嘅Joystick都好玩過你啦！」

用法： 呢句簡直就係妹豬撩交嗌嘅殺手鐧呀！一經出口，男方肯定瞬間崩潰⋯⋯毒L想捍衛打機自由，唔怕死都可以試下講呢句嘅⋯⋯

劉德華－《中環英雄》

講起華仔同偉仔，個個淨係識《無間道》，其實佢哋一早合作過啦！仲要當年就已經識玩對調身份，古惑仔變保險Sales， Sell開保險就變咗去片車講數?。

毛毛特別推介偉仔講數呢一幕，講到好似數家譜咁，睇完包保你對中國傳統複雜嘅家族體系有深切嘅了解呀！同場加映惠敏哥飾演反差萌黑社會大佬⋯⋯喂，著埋圍裙整餅氹囡囡喎～有幾可見到佢咁cutie嘅一面先？

冷門指數：3.5粒星

毛毛9選對白：「我大佬講嘅就係Fair，Play就我同你Play！」

用法： 你覺得你會有份用咩？你係聽嗰個咋⋯⋯對腦細嚟講，佢講嘅嘢就係Fair，Play就你上司慢慢同你Play啦！當然，將大佬轉做阿爺，由香港官員講出嚟一樣適用。香港人，睇開啲啦⋯⋯

張學友－ 《鼠膽龍威》

學友做笑片就成日見，但係呢套動作笑片就肯肯定唔係台台都會翻播喇～事關學友喺入面飾演一個又咸濕又爛酒，兼且差唔多廢晒武功嘅武打巨星，所以好多人都話係影射緊某人喎⋯⋯

邊個？嗱嗱嗱 ，毛毛冇話係拎咗奧斯卡老人獎嗰個呀！當然，毛毛當年都唔係為咗睇佢影射邊個，係想睇女神Charlie姐姐多啲囉。不過唔睇返都唔知，原來妹豬話用兩隻手令一個男人開心嘅爛Gag， 歷史係咁久遠㗎！

冷門指數：4粒星

毛毛9選對白：「人是要靠自己的」

用法： 當豬隊友又想畀屎你執搞到你OT，你可以用一個親切到想問候佢親人嘅笑容，拍住佢膊頭同佢講呢句說話。不過去到最後，你腦細都係會叫你幫手快啲搞掂佢⋯⋯

黎明－ 《新戀愛世紀》

一睇個名就知呢套嘢係食住當年日劇《戀愛世紀》個熱潮拍㗎啦！不過除咗好夾硬咁拉咗個水晶蘋果入劇情之外，係同日劇劇情一啲關係都冇囉⋯⋯

呢套戲除咗睇黎天王Chok住享齊人之福，最正就梗係睇佢身邊俏秘書李鞍啦，如果毛毛有個咁嘅秘書，一定每日都好忙⋯⋯忙住同佢四圍去開會喇。呢套戲入面仲加插咗新舊機場交接嘅情節，睇到都有少少懷念細個喺九龍城聽到嘅飛機聲⋯⋯

冷門指數： 3粒星

毛毛9選對白：「感情係嘅嘢係靠積分嘅，邊個喺我心目中扣得分多呢，我就唔會同佢喺埋一齊。」

用法：簡直就係娘娘收兵必備對白呀！如何同時畀幾個兵仔追又不失霸氣，咪就係咁囉～點解你升唔到上將軍？你唔夠fun囉仲問⋯⋯

封面圖片及資料來源：電影《千面天王》截圖、電影《中環英雄》DVD封面及截圖、電影《鼠膽龍威》海報及截圖、電影《新戀愛世紀》海報及截圖