2017年04月29日 星期六
【要減肥了】遊客日日狂餵食 泰國馬騮肥到成個波咁
唔食嘢又邊有力減肥？雖然講係咁講，但你都唔好齋食唔減、連郁都唔願郁先得㗎！
話說，泰國曼谷水上市場有隻肥馬騮就係因為狂食嘢又唔做運動，所以搞到自己有成15公斤咁重，體重足足係正常馬騮嘅兩倍呀！唔止咁，佢仲畀當地居民改咗個名叫Uncle Fatty?！而肥叔之所以肥到成個波咁，咪就係因為一班熱情嘅遊客囉⋯⋯
個個遊客見到肥叔都猛咁畀嘢佢食，有時畀下生果，有時就畀下粟米，加上肥叔又唔鍾意郁動，日日坐喺地下係咁食食食喎，唔肥都變肥啦！
喂老老竇竇，肥叔你日日咁食法唔係路喎，再肥落去容乜易搞到周身病痛㗎？
雖然有保育團體就話暫時未發現肥叔有任何健康問題，唯一嘅問題就係肥叔肥到唔願郁，搞到喺社交上有啲困難，不過泰國野生動物局嘅官員就擔心肥叔會患脂肪癌，所以已經送咗肥叔去醫院做身體檢查，假如檢查過肥叔身體真係冇問題嘅就會送佢去減肥，希望幫肥叔減最少7公斤咁話喎。
毛毛都希望肥叔可以快啲減完肥，健健康康咁返嚟埋堆啦！
提醒返，今次呢件事正正話畀大家知，餵動物食嘢唔係唔得，但都要考慮返嗰隻動物本身會唔會已經有足夠嘅糧食。如果大家過份餵食，咁就有可能會影響到嗰隻動物，變成好心做壞事㗎喇。
資料來源：คนรักลิงหัวใจแกร่ง／Facebook、metro
睇埋：
