經常喺日本車站見到好多好靚嘅觀光宣傳poster，每次見到呢啲poster都有種好想親身去當地見識一下嘅衝動。而最近，有日本網民都喺新宿站發現咗一系列好出色嘅秋田縣觀光宣傳poster，聽講每張poster入面仲有隻超得意嘅秋田犬亂入?⋯⋯

喂喂喂，咩亂入呀？你講清楚啲好喎，講到秋田縣名物就梗係非秋田犬莫屬㗎啦！你哋話嘞，有咩好得過搵秋田犬嚟介紹返秋田縣先？廢話少講，一齊睇下呢隻秋田犬介紹咗啲咩吖～

秋田縣大館市－切蒲英鍋

秋田縣係一個盛產米嘅地方，而切蒲英就係用秋田米整成㗎喇（其實即係烤米卷）。用切蒲英、雞肉同菜等等嘅材料煮成火鍋咪就係其中一個食法囉。大家睇下隻秋田犬眼定定咁望住煲切蒲英鍋個樣幾陰功，攝影師快啲畀佢收工放飯啦！

秋田縣男鹿市－哥斯拉岩

呢嚿岩石因為外形好似一隻叫緊嘅恐龍，所以大家都叫佢做「哥斯拉岩」。吖，又估唔到秋田犬剪影嘅氣勢一啲都唔輸蝕畀哥斯拉啵～汪！

秋田縣男鹿市－生剝鬼節

一到生剝鬼節，一眾大人就會扮成生剝鬼咁走去每家每戶，而屋主都會用酒同年糕嚟招呼生剝鬼，然後生剝鬼就會保佑呢家人喺新一年健健康康、豐衣足食㗎喇。話時話，阿秋田犬你一個伸脷就搶晒後面班生剝鬼鏡，咁樣公平咩？

秋田縣北秋田市至仙北市－秋田內陸縱貫鐵道

每段鐵道都會有唔同嘅風景，而北秋田市至仙北市呢段鐵道嘅風景就每年都會吸引好多鐵道迷嚟朝聖嘞！嗱，靚景配美狗，呢張宣傳照毛毛畀10分！

老老竇竇，本身啲poster已經影得夠靚㗎啦，而家仲要搵埋隻咁得意嘅秋田犬嚟賣萌，咁樣宣傳法仲邊有人夠你玩呀？睇嚟真係要去返轉秋田先得⋯⋯唉，shut up and take my money啦！

資料來源：shinmeitorii1／twitter、akitafan