眾所9知，葵涌廣場不嬲都係一個女人天堂，一個商場就可以買晒衫褲鞋襪兼食好西⋯⋯重點係，嗰度啲衫平到50蚊就有件，價廉物美，有邊個女人唔鍾意行葵廣呀？之不過原來葵廣除咗係女人天堂之外，仲係小偷天堂嚟㗎喎！最近有葵廣嘅店主就透過cctv拍到有人偷衫喇！

嗱講明先，整個偷衫嘅過程都幾複雜，大家留心啲睇⋯⋯

1）首先個女人拎起咗衫A，然後埋鏡拼下。

2）跟住佢拎起埋衫B，又埋鏡拼下。

3）隻手揸住衫A、B嘅佢行咗去鏡頭左下角嗰邊繼續望衫。

4）摷完發覺嗰邊冇衫啱，佢再次拎住衫A、B埋鏡拼下，然後將衫A、B放返原位。

5）而家輪到行去鏡頭右下角嗰邊繼續望衫。

6）佢拎起衫C埋鏡拼下，覺得唔啱放返低。跟住佢再拎起衫D埋鏡拼下，覺得唔啱，又放返低。

7）戲肉嚟！兩手空空嘅佢返去最原先嗰個衫架度拎返起衫A、B，然後拆衣架，再拎住已拆衣架嘅衫A、B埋鏡拼下！

8）望下左望下右，見冇人留意佢就直接拎住衫A、B行出舖頭！

9）sorry仲未完。最後佢再喺舖頭最出個衫架度摷多兩下⋯⋯ok，而家交足戲可以慢慢閃人喇。

嗯，無數次嘅「埋鏡拼下」⋯⋯毛毛講完一次都覺得好攰。btw，都係嗰句：「面係人地畀，架係自己丟」，唔理啲衫係幾十蚊一件又好，幾百蚊一件都好，個個入嚟都拎兩件走，人哋仲使做生意嘅？香港地，生意難做呀。

資料來源：感謝網民 Heidi Chan 同意轉載