做隻貓做隻狗不做情人～我哋人類就識得咁諗啫，話唔定而家連企鵝都想跟住唱返句，表達對愛情嘅灰9喇。話說最近日本東武動物公園同hit爆嘅動畫《動物朋友》合作，喺每個動物園區都擺返嗰種動物嘅角色紙板，等大家行動物園嘅時候多樣嘢影下相、打下卡咁嘅～
就好似獅子區就擺獅子女、袋鼠區就擺袋鼠女、駱駝區就擺駱駝女、草泥馬區就擺草泥馬女……總之就全部都係女啦。不過唔好以為人哋好似你班毒L咁，一見到二次元女女就會流晒口水咁先得㗎，啲動物都不知幾有矜持呀，你有你打卡，佢有佢行行企企，當班動物朋友唔係朋友咁囉，你吹咩。
不過，同一時間，喺動物園嘅另一角，就發生咗段可歌可泣嘅愛情故事喇。話說今年有隻已經20歲，叫做グレープ君嘅企鵝，竟然臨老入花叢，學人迷上咗呢個《動物朋友》 角色喎，不過好可惜吖，人哋後生細女大把世界，邊度會show佢啫。
呢隻痴情企鵝仔（其實都應該叫做企鵝佬喇）對個紙板一見鍾情，連續幾日乜都唔做，淨係一碌木情深款款咁望實二次元企鵝女，聽講仲食唔安坐唔樂，因為咁而瘦晒?呀陰公……動物園擔心企鵝佬咁樣落去會對身體唔好，唯有做下醜人，加個網喺中間隔一隔，希望佢醒下啦。不過以企鵝佬嘅眼神睇嚟，都係冇嘢可以阻到佢對企鵝女嘅愛㗎喇……
有網民唔忍心企鵝佬同企鵝女剛萌芽嘅愛情故事無疾而終，一於出手幫下佢，等佢哋兩個可以喺二次元嘅世界繼續開花結果，真係好令人滾動呀……如果痴情企鵝佬唔係企鵝而係一隻豬，唔知會唔會想講返句「多情自古空餘恨」呢？
彼の名前はグレープ君です。（写真右側のペンギン）年齢は20歳。ペンギンの年としては、おじいちゃんです。
— 東武動物公園【公式】リュウくん (@tobuzoo7) April 26, 2017
かなり、お気に入りですね。 #けものフレンズ #ペンギン #東武動物公園 pic.twitter.com/vkLOzGlueB
封面圖片、資料來源連結：tobuzoo7／twitter、sisukaton／twitter、mitsumotocs／twitter、kyockcho／twitter
