拍緊拖嘅朋友都知啦，一年到晚就算唔計情人節之類嘅節日，都仲有相識紀念日呀、拖手紀念日呀、kiss kiss紀念日呀、拍拖紀念日（唔知點解係每月慶祝一次嘅）呀咁，真係記到人頭都大埋。頭嗰兩年都仲可能會個個月整張卡仔寫下情信，間中又整下DIY禮物當係surprise嘅，不過如果連婚都結埋，可能淨係買件西餅慶祝結婚紀念日㗎咋……

不過你又唔好以為淨係買切件西餅慶祝就好頹喎，如果真係愛，一樣搵到位畀你放閃嘅！日本呢個老婆仔就話佢特登買咗幾件蛋糕慶祝結婚紀念日喇，點知一返到屋企先知，老公仔竟然都買咗呀！不約而同咁買咗蛋糕唔出奇，大家都咁啱買埋同一款先出奇吖嘛，每人買咗三件，有兩件都一樣，呢啲唔係緣份仲會係咩先？

兩個人一齊得耐，真係會同對方愈嚟愈夾，唔使出聲都知佢諗緊乜㗎。唔係點會有另一個網民都post相話佢都遇到一樣嘅情況啫？

唔止買蛋糕係咁呀，有個網民仲話佢舊年聖誕同女朋友咁啱買咗同一款情侶米奇米妮手錶?呀！心有靈犀到咁樣，真係隔住個mon都聽到米奇嗌緊呢舖打和咁呀！

今日は結婚記念日だしとケーキを買って帰ったら夫も同じ店でほぼ同じ内容のケーキを買ってきていて笑ってる所。 pic.twitter.com/5mr9zznn1N

— ものぐさ (@nikyuu) April 28, 2017

封面圖片、資料來源連結：nikyuu／twitter