行街最怕遇到淨係識望電話又唔識睇路嘅低頭族。大佬，玩還玩吖，睇路好冇？香港地條路咁窄，人哋想避你都避唔到啦，係咪要搞到連行路都要考牌下你先安樂呀？

最近，有網友就影咗呢張相畀大家睇，聽講呢條路係位於日本名古屋嘅久屋大通公園嘅⋯⋯咦，邊個喺條路度整兩個水池咁大整蠱呀？左一個水池，右一個水池，真係睇少陣路都分分鐘會成個人跌咗落去啵！

另外，網友話水池入面仲有啲龜仔同魚仔喺度?～唔通呢兩個其實係主子專用嘅泳池嚟？嗯，畀你諗到就唔係日本人啦！以毛毛9估，其實呢條係一條跑道就真！

大家睇下，呢條路係咪同Mario Kart入面條Bowser Castle跑道一模一樣呢？吖，咁到底呢個時候加速跳過去好吖，定飄移過去好呢？

老老77，橫掂而家都有真人版嘅Mario Kart咯 ，不如申請埋呢條路嚟做跑道吖笨！打機打咗咁耐，實踐技術嘅機會嚟喇飛雲！

喂，你唔係真係想揸車過去呀？你唔顧下自己隨時失手變落湯雞，都諗下個池入面啲龜龜魚魚吖，佢哋係無辜㗎⋯⋯嗱，乖乖地行公園，唔好殃及池魚啦好嗎？

封面圖片及資料來源：satumapoteto／Twitter、GreenKokiri54／Youtube、Maaricar／Facebook