正義嘅朋友梗係人人都鍾意啦！但係要不是怪獸做反派侵略地球，你哋超人一早冇得撈啦！嗚⋯⋯怪獸嘅心酸又有邊個知呀⋯⋯啲人個個見到超人就仆倒去影相，一見到怪獸就嗌救命走，公平咩？

好似巴魯坦星人咁，咪睇佢有兩隻大鉗咁兇猛，其實佢都有溫柔嘅一面㗎！

見到有人行過，巴魯坦星人就即刻Chok個型仔甫士出嚟同佢say Hi喇！仲要三七面驚死自己唔夠上鏡咁啵～

但係可惡嘅地球人居然無視佢呀！你睇下佢個樣幾無奈？你哋啲地球人唔好咁啦，平日巴魯坦星人猜親包剪揼都輸已經好慘㗎喇，你哋仲對佢咁冷淡⋯⋯畀下面吖，話晒都宇宙忍者吖。

「嗚⋯⋯成日都打輸畀超人，猜包剪揼連叮噹都贏唔到，而家仲要食檸檬⋯⋯」

巴魯坦星人你唔好咁傷心啦，毛毛明㗎，我真係明㗎，好似我哋呢啲一事無成又成日畀娘娘請食檸檬嘅人，說穿了咪又係Your Face，Your Fate⋯⋯鬼叫你冇超人咁型仔咩。難怪巴魯坦星人輸咁多次都要侵略地球啦～原來唔止為咗啲仔，仲係畀地球人傷咗佢個心呀！

所以話怪獸好與壞，在乎溝通與關懷！大家下次見到巴魯坦星人就畀個親切嘅問候佢啦下～

封面圖片及資料來源：satumapoteto／twitter