古乳有暈：「老虎唔發火咪當佢病貓」，其實威猛嘅貓科動物又點止得老虎吖，仲有百獸之王獅子呢～特別係獅子公呀，啲鬃毛又粗又濃密咁型仔，難怪咁多公司都放對石獅子喺度助陣啦！就好似日本嘅三越百貨咁，門口就有兩隻好出名嘅石獅子，係遊客打卡嘅熱點嚟㗎。如果好彩撞啱啲咩特別活動，大家仲有機會遇到特別版嘅獅子?！

例如早幾年嘅大褸促銷活動，石獅子們都玩埋一份，著住大褸做代言人。嘩，型仔得你吖，啲女都畀你溝晒啦！

火呢樣嘢咁危險，分分鐘會釀成森林大火，作為大王就梗係要Cos下消防員，支持一下防火活動啦！無論係消防制服定大褸都Carry得咁好，果然係做Model嘅材料呀下！不過最近廣島三越嘅職員就好似好大整蠱咁啵⋯⋯

咦，大王乜得你咁cute cute嘅？帶住對毛茸茸嘅貓耳不但止，仲要帶埋個啷啷?？唉今次真係霸氣盡失，咩形象都冇晒喇！

雖然大王因為廣島嚟緊呢兩日有貓祭，所以先要搞成而家咁，但大王你又唔使咁sad嘅，話晒你都係一隻貓科動物，貓祭你都有份㗎！而家只係將你嘅少女心釋放出嚟啫，你咪享受下做一隻大貓嘅時間囉～話唔定啲妹豬見你咁卡哇依，仲會搵你影多啲相呢！

封面圖片及資料來源：gooitch／twitter、班大貓廢紙背面塗鴉