送禮物真係一門學問，特別要送嘢畀妹豬嗰陣，又要驚買錯嘢畀人鬧，又擔心對方覺得你求其買冇誠意，真係好難捉摸呀！

其實送禮嘅嘢，唔係下下話要買Panadola先夠誠意嘅，自己親手整嘅禮物咪仲有心思～唔識整爆炸卡嗰啲複雜嘢，咪學下整糖仔，都一樣夠晒Sweet嘅～

材料好簡單。雞蛋六隻、糖呢就兩茶匙～哎吔，睇錯食譜?，係要用水、糖、系寒天（即係寒天條）、食用色素同金箔先啱～只要溶咗啲寒天，加埋啲糖落水度就得㗎喇！

不過要做到漸變色，首先就要分返三盆，一盆落淺藍色色素，一盆落深藍色色素，另一盆就由佢透明咩都唔使落～跟住順序倒淺藍、深藍同透明嘅寒天液入個大兜度就得㗎喇～最好就跟住圖咁，一種色一邊，透明倒中間啦。記得唔好咁叻叻豬走去搞勻佢呀～

金箔就隨個人喜好加，睇下你想個夜空多唔多星星啦～雪硬咗再切成一塊塊就變成靚靚嘅夜空琥珀糖喇，真係又靚又Sweet，連主子都畀啲糖吸引住呀！

「奴才做咩拎啲水晶出嚟曬呀喵？」

用唔同顏色嘅色素整仲有唔同效果?！呢款用咗淺藍加紫色嘅色素，望落又真係幾似水晶喎，咁如果用桃紅色、藍綠色加紫色整，咪可以整埋銀河琥珀糖囉～女人咁鍾意啲靚靚blingbling嘢，佢哋收到實好開心啫～毛毛知你哋㗎，又想笑我冇女吖嘛。咩啫，家陣阿媽唔係女人咩，整畀阿媽唔得嘅，母親節就到喇衰仔！

封面圖片及資料來源：boku_5656／twitter