男人有男人嘅浪漫，小朋友都有小朋友嘅浪漫㗎，咪就係用啲你搲爆頭都諗唔明嘅方法嚟玩玩具囉～小朋友玩玩具，你哋啲大人識條路軌咩，所以啲大人咪成日大驚小怪囉～

好似之前有個小朋友，人仔細細就知道餐桌禮儀幾重要喇！你知啦，而家食件撻都要講Manner㗎嘛，所以阿仔咪學啲大人掉麵包落湯度降溫囉～不過由於時間嘅關係，冇麵包所以拎住方包超人頂住先啫，阿媽就話佢似搞緊邪教儀式喇！

其實小朋友寓食飯於遊戲都幾好呀，咁食飯咪變得充滿樂趣囉～Yeah！不過阿仔，乜阿媽冇教你不要玩食物咩？

阿仔你玩還玩呀，拎阿媽親手整嘅蘋果杏仁蛋糕做車禍現場，咁算點先？呢個又唔係杏（仁）加橙蛋糕，你唔使真係剷晒啲車上去下嘛？

其實阿媽你怪錯囝囝喇，囝囝見你個蛋糕咁寡，上面又冇裝飾，咪幫你插啲車仔上去做裝飾囉！人哋之前喺網上瘋傳個搖控車蛋糕都係拎啲蛋糕做泥頭咋嘛，呢個蛋糕其實都幾有狂野時速feel吖，係啲車仔唔食得咁解啫～囝囝細細個就咁有天份，大個一定係一個成功嘅阿茂啫！

封面圖片及資枓來源： varatoril／twitter、yukimi_0615／twitter、Pandora Cake Shop／Facebook