啲人成日話天氣轉涼先啱BBQ，但夏日熱辣辣好熱好熱嗰陣，佢哋咪又係照燒嘢食～不過一班人一齊BB蕉又真係幾開心嘅，最緊要係成班人入面，總有啲高手一係唔燒，一燒嚇你一跳呀！

BBQ燒龍蝦同鮑魚，再唔係拎個紙箱去燒雞呢啲都濕濕碎啦，起碼都仲叫BBQ吖嘛，睇住啲嘢食慢慢燒熟，真係寧舍有風味㗎！同喺屋企拎住個鑊嚟煮簡直係兩回事呀～但係充滿智慧嘅C9就未必咁諗喇⋯⋯

「燒嗰一塊半塊肉都要咁耐，拎個鑊出嚟一次煎晒佢好過啦！」

媽呀！你喺邊度變隻煎pan出嚟㗎！你而家係煎肉唔係烤肉喎！仲要煎埋魚?，咁點解要特登出嚟透爐燒嘢食呢下？阿姐話，原來佢係唔想啲肉同魚黐住個網，咁咪拎兩個pan放喺個爐上面煎嘢囉～

咁都畀你諗到，係醒嘅。拎個煎pan嚟「燒」嘢食咪算係咁囉，你再咁多嘢講，一陣佢好似呢位網友咁拎個石油氣罐嚟燒你就知味道！

不過呢位網友都唔係真係想燒石油氣嘅，佢只係改裝咗個石油氣罐用嚟燒隻雞同煲湯啫～咁都幾有創意吖！其實拎隻煎pan嚟BBQ又有咩出奇喎，平日啲人拎埋個煲去煲糖水涼茶?啦！毛毛見過，毛毛真係見過㗎。

封面圖片及資料來源：kurotiroru／twitter、楊龍少​