狗狗係人類最忠心嘅朋友，可惜唔係個個人都當佢哋係朋友㗎。有啲人本身就唔鍾意狗狗，又有啲人養咗先覺得狗仔好麻煩好嘈喎。嗱，如果你唔鍾意一個人，你最多都係唔理佢，或者喺背後鬧佢啫。但係有啲人唔鍾意狗狗之餘，仲會蝦汪星人冇能力反抗，於是虐待佢哋，甚至殺死啲狗仔?㗎，實在太過份喇！

最近有18區動保專員喺馬鞍山嘅沙灘度見到一隻可憐嘅狗狗橫屍海灘，身上綁住一條綠色繩，綁法仲好專業，絕對唔係狗狗意外畀繩繞住可以造成嘅效果嚟㗎！無啦啦又點會綁條繩上狗仔度呀？唔係粗繩當狗帶咁誇張呀？

動保專員見到狗狗死因咁可疑，梗係要繼續睇下有咩線索啦⋯⋯竟然畀佢發現咗附近有嚿大石用同款嘅綠繩同繩結綁住咗呀！

嘩，啲證據齊到咁，連平日淨係識9估嘅毛毛都睇得出有人將嚿大石同狗狗綁埋一齊，再將隻狗掉落海啦！蓄意謀殺咁離譜，報警拉佢啦！

但係警察嚟到之後竟然話狗狗係自己游水浸死冇可疑，所以close file喎⋯⋯唔係下化，阿蛇你唔係想同我講狗狗識自己綁嚿石上身, 仲可以行到去游水呀？不如你示範一下綁住嚿石頭去游水畀大家睇下吖？

暫時最新消息就係義工已經搵咗傳媒同議員跟進呢件事，但係佢都希望可以透過多啲人Share佢哋個Post，引起多啲人嘅關注，逼警方要徹查呢件事！希望真相快啲水落石出，可以幫狗狗伸冤啦⋯⋯

封面圖片及資料來源：Mark mak