去動物園識影梗係唔會淨係影動物啦～話晒啲動物咁有性格，可遠觀而不可褻玩，你想同佢影幅呃like相，都要夾定天時地利人和先搞得掂呀！好彩好多動物園都會有返啲特別嘅佈置畀啲遊客影相啫！

而最多人like嘅佈置就梗係啲打卡紙版啦～唔使煩用咩甫士，又唔使擔心嗰日著得唔靚喎，淨係影個樣就得喇，真係既方便又快捷呀！

咦？之前呢個位明明有塊打卡紙版㗎，點解變咗幅畫嘅？老虎媽媽攬住嗰隻老虎BB又畫得幾似喎衰鬼～睇真啲，點解識郁嘅喂！原來係老虎仔個頭咁啱喺打卡紙版嗰個窿位度呀～咁完美嘅偽裝都畀你諗到，果然係獵食高手呀下！

你以為得老虎識隱藏自己咩，打耳到爆嘅熊本熊部長夠識啦！佢一見到自己塊紙版，就即刻攝位影相喇～不過部長呀，你⋯⋯多咗一對手喎。唔通你想變身做千手部長？

唔係下下要扮返自己先搶到fo嘅，扮其他動物都得㗎～好似馬騮仔咁，你以為佢會扮返馬騮，點知佢竟然係扮熊貓喎！呢啲咪有實派士囉！等你哋以為淨係人類先識影打卡紙版呃like，其實啲動物分分鐘仲叻過你呀～

封面圖片及資料來源：sumineko_L／twitter