肉球呀～誰都喜歡你～小貓也自豪（唔好問邊間教會）！

最近，日本「Felissimo貓部」就推出咗六款貓貓肉球襪，滿足一下貓奴想同主子一樣擁有肉球嘅慾望！事不宜遲，一齊睇下啲貓貓肉球襪有幾cute先！

呢六款貓貓肉球襪每款嘅顏色同pattern都唔同，大家可以根據主子身上嘅斑紋買返類似嘅款式。而講到貓貓肉球襪嘅重點－肉球呢，對肉球就梗係唔係就咁染上咁簡單啦！大家睇下，對肉球微微凸出，摸上手真係有幾分似堅．肉球嘅質感㗎～

一對貓貓肉球襪就承惠808円（連稅，大約港幣$55）。例牌啦，「Felissimo貓部」每賣出一件商品就會捐出部分收入作為慈善用途。今次呢對貓貓肉球襪每賣出一對，「Felissimo貓部」就會捐出22円畀「フェリシモの猫基金」㗎喇！

只要著上呢對襪，一眾貓奴就可以同主子一樣擁有肉球嚕～

都係嗰句啦，容易襯衫吖嘛.jpg

btw，其實「Felissimo貓部」已經唔係第一次推出貓貓肉球襪㗎喇，早前冬天都有推出一個厚身啲嘅版本。今次推出嘅貓貓肉球襪比較薄身，適合返一眾奴才喺夏天嘅時候著。

資料來源：felissimo

延伸閱讀：

【不得了】係有肉球觸感嘅化妝棉呀！

【係肉球呀】埼玉縣「貓手燒」會唔會係送畀貓奴嘅最佳手信？