男人最痛算這種！最近，有網民就含住淚咁同大家分享咗一次慘痛嘅經歷。

嘩！咁多《復仇者聯盟》figure嘅？

話說，有次呢位網民就見到一間模型舖入面擺咗好多現貨，於是佢把心一橫，一次過買晒舖頭入面所有《復仇者聯盟》嘅現貨figure返屋企。就係咁，佢就開始踏上咗儲figure呢條不歸路！而除咗新出嘅figure之外，佢仲開始儲返以前出過嘅figure，另外加上佢咁啱遇到幾個突然轉會唔玩《復仇者聯盟》嘅賣家，所以佢想儲嘅figure幾乎都儲齊晒咁滯㗎！

正當佢諗住再裝修一下，訂返個靚啲陳列櫃嚟擺佢啲心肝寶貝嘅時候，個天喺今年4月1日愚人節同佢開咗個好大嘅玩笑⋯⋯佢屋企意外發生咗一場大火，呢場大火將呢位網民所有命根燒成灰燼⋯⋯

呢位網民表示，佢今生今世都唔會忘記呢個畫面。雖然佢知道自己同屋企人可以喺呢場大火執返條命已經好好彩，但當佢望住呢堆殘骸嘅時候，佢個心依然係好痛⋯⋯好痛⋯⋯

唉，唯一仲認得出係咩嚟嘅就只有雷神個鎚同美國隊長個盾咋⋯⋯

喺呢場大火之後，呢位網民間唔中都有去模型舖搵老闆吹水，仲有少少想買返啲figure嘅衝動?！可惜佢一望到呢啲figure個腦又會浮現火場入面嘅畫面出嚟⋯⋯所以呢位網民猶豫咗一個月之後，最後都係決定以後唔再買figure。

btw，雖然而家講咩都冇用，不過「不在乎天長地久，只在乎曾經擁有」，人冇事就好了。

資料來源：廣闊的宇宙／微博