再威猛嘅主子都會有淆底嘅一日，特別係對住啲電器怪獸，淨係聽到佢哋啲咆哮聲已經嚇餐死啦！好似嗰部叫吸塵機嘅怪獸咁，奴才成日都放佢通屋走，想嚇死主子咩！大膽呀你！

主子，你做咩咁睇唔開攝自己入條罅度呀？雖然個雪櫃個散熱位暖暖地好舒服啫～原來頭先主子聽到直升機怪獸嘅聲，於是就嚇到衝咗入雪櫃側邊條罅度匿埋唔肯出嚟喇！

「奴才，仲影！出面有怪獸呀喵，仲唔快啲護駕！」

係嘅主子！但係你避難都避得咁打耳，奴才點可以唔影多幾多相先呢？主子你等等呀下，影埋呢張就嚟救你㗎喇～

「哼，淨係掛住影相，唔睬你喇喵！」

呢隻可愛嘅主子叫Miru，除咗聽到直升機聲嗰陣會匿埋得咁可愛之外，佢平日都會喺奴才面前賣萌㗎～搞到奴才成日都要忙住幫佢影靚相呀～

就連瞓覺個樣都寧舍Cutie，Miru攬住個枕頭瞓得咁冧，唔知係咪發夢見到好多罐罐呢？

「奴才，我問你，佢可愛啲定我可愛啲呀喵！唔準諗，即刻答！」

喺奴才嘅心目中，梗係永遠都係主子最可愛㗎啦～仲使問嘅？話薯話，主子你咁可愛又咁受歡迎，不如你都去拍下廣告吖，咁奴才咪有多啲錢可以買罐罐供奉你囉～

封面圖片及資料來源：milkymirukun／twitter