行街經過啲手作舖嗰陣都會好想問，究竟點整先可以整到啲咁靚嘅手作仔㗎！特別係啲羊毛氈公仔，睇啲人拎住幾撮毛，喺塊海綿上面篤下篤下就整到啲小動物出嚟，真係好犀利呀！搞到毛毛都好想試下?～

反正而家12蚊店都有得買，又平又簡單，啱晒我哋啲初哥入門啦！不過啲高手間中都會想整返啲簡單嘢嘅，好似呢位日本網友咁，諗住買返包Q版老虎呢啲簡單嘢篤下啫⋯⋯

哎吔，認真咗?，唔小心用多咗兩成功力，搞到Q版老虎仔變咗兇猛嘅大老虎喇！高清4K咗啫，嚇毛毛唔到嘅～不過網友你放晒啲材料落個頭度，個身搞到營養不良咁，呢啲係咪叫虎頭蛇尾，定係老虎頭老襯底呀？

冇計啦，邊個叫網友係高手高高手先得㗎，人哋平日就係整開超逼真嘅羊毛氈小動物㗎嘛～咁梗係會忍唔住手㗎啦～網友你又係嘅，100円買返嚟嘅羊毛氈係預你整100円嘅質素㗎嘛，你整到咁高汁，邊夠你用啫～

睇埋網友twitter上面嘅其他作品就知佢真材實料有保證啦！好似呢堆可愛嘅貓罐罐，見到都想帶幾罐返去呀～

啲刺蝟BB都好打耳呀～仲要好似坐喺個袋仔度望住你咁?。呢啲啲羊毛氈公仔咁逼真，最啱就係啲想養寵物但係又唔養得嘅朋友，起碼可以止下心癮先吖，仲可以帶埋啲公仔四圍去影呃like相?！

封面圖片及資料來源：hinalifelt／twitter