到底咩先叫做藝術呢？多人鍾意嘅，到底係普及定係藝術？冇人識欣賞嘅，又算唔算係藝術呢？係咪答唔出呢，唉，一早都叫你去多啲藝術展覽，提升下自己㗎啦！

英國呢個叫Gray嘅大學生咪乖仔囉，讀大學唔會淨係掛住走堂／摺拉把／返part time㗎，而係花時間行下大學入面嘅藝術展覽，幾有氣質呀。話說佢見到有個吉嘅展台，於是靈感到，擺咗個菠蘿上去，諗住睇下個菠蘿可以非法逗留幾耐，或者有冇人真係當佢係展品喇。

點知，第二日佢返去睇下有咩成果嘅時候，就見到個菠蘿畀人珍人重之咁擺咗入個玻璃箱度喇！照計可以搵到玻璃箱保護展品嘅，都係展覽搞手吖，又點解會連佢哋都當正個野生菠蘿係展品㗎呢……藝術嘅嘢，真係睇唔透。

過咗兩日，校方終於都知道畀人惡搞，搬走咗個菠蘿喇。不過咁又點吖，呢幾日已經有唔知幾多個好傻好天真嘅同學仔為呢個價值一蚊英鎊嘅菠蘿而停低腳步、思考當中有咩高深含義喇……Gray咁有藝術觸覺，唔知學校會唔會頒個永遠榮譽藝術學位畀佢呢下？

封面圖片、資料來源連結：Ruairi Gray

同場加映：【不是很懂你們藝術圈】喺展覽館地下擺低副眼鏡 大家竟然…