細個去M記，最鍾意就係又食又玩，拎啲薯條點少少茄汁咬住，扮吸血鬼嚇阿媽！就算大個咗，都唔會正正經經食薯條㗎，係都要自己發明啲新用法畀佢，就好似用嚟點雪糕食，或者用嚟當地拖咁用囉。

咩話？當地拖咁用？即係食漢堡包唔小心跌咗啲醬出嚟之後，用薯條抹走佢再食返呀！相信十個食M記嘅人九個都遇過呢個情況㗎喇，不過用薯條嚟拖返啲醬，好易搞到成手都污糟晒，一係就拖到條薯條軟晒喎，點算好呢？

唔使驚啵！燈燈燈凳 ！美國M記最近就新出咗款薯條叉，等大家都有叉用喇！佢其實係一個膠套嚟嘅，闊度就應該啱啱好可以插到三條薯條～

有咗呢支世人夢寐以求嘅薯條叉，就可以輕輕鬆鬆咁掃返跌咗出嚟嘅醬食返啦！食得又玩得，正呀喂！

麥當奴叔叔，你唔係以為大家真係會淨係插薯條入去咁乖下話？插到三條薯條，唔係唔成件麥樂雞插埋入去呀？唔知呢個萬能插嚟緊又會畀世人發展到啲咩用途出嚟呢？

封面圖片、資料來源連結：McDonald's／YouTube、 thriftandmakeup／instagram、lnc_eats／instagram、optimistictom4000／instagram

其實唔關事不過介紹返：【母親節獻禮】連炸雞上校都做到愛情小說主角…