結婚係人生大事，唔單只代表你終於搵到個人肯同你過人世呀，仲表示你長大成人，自己成家立室，揭開人生新一頁啵，梗係要多謝父母養到你咁大個人啦，如果唔係，又點會有跪地斟茶畀長輩呢個環節呢？

一對新人跪喺爸爸媽咪面前，答謝佢哋多年嚟嘅養育之恩，又聽爸爸媽咪講幾句「大個喇，生生性性呀」之類，成個畫面真係諗落都覺得笑聲笑聲滿載溫馨呀……

最近，台灣有對新人結婚嘅時候拍咗片留低呢段珍貴回憶啵。坐喺梳化度嘅，就係新娘子爸媽喇，新郎哥斟茶畀外父嗰陣，大大聲咁叫「爸！」，真係好感人呀！終於都唔使叫世伯，可以叫一聲爸喇，真係恭喜你呀！

飲多杯勝嘅各位乾杯！飲勝！

咦喂，咪住先！新郎哥你做咩自己飲咗杯茶呀！呢杯係就係叫做「女婿茶」，不過唔係畀女婿飲咁解喎！見到佢舉杯暢飲，本身跪喺隔籬嘅新娘子都hold唔住，成個人坐低碌大對眼望實呢個老公仔喇！

結婚係人生大事，而呢頭婚事對呢家人嚟講，一定比難忘更難忘喇……新娘，你又唔好咁sad，雖然你要將下半生嘅幸福交畀個咁傻咁天真嘅老公，但係起碼都可以肯定到佢係零經驗嘅結婚新手吖！

封面圖片、資料來源連結： Alex Chou／爆料公社