動物園咁多動物，好難隻隻都花咁多時間睇同影相㗎，所以好多人都係走馬看花咁，係咁意睇下就算㗎喇，分分鐘你喺個欄入面放第二種動物都冇人發現?啵。

話就話咁講啫，都唔可以太過離譜嘅，例如啲人想睇企鵝，你都冇理由放隻燒鵝入去㗎係咪？但係喺日本日立巿嘅動物園，飼養員就幫刺蝟搵咗個好奇怪嘅替工幫手喇～

呢隻刺蝟咁熟口面嘅？在哪裡～在哪裡見過你呢⋯⋯吖～係廁所呀！咁似鮑魚刷嘅喂！唔係喎，呢隻堅係鮑魚刷嚟㗎啵！撞鬼你咩，做咩放隻鮑魚刷入個缸度養呀？以毛毛9估，唔通有人跌咗隻鮑魚⋯⋯刷落地下，飼養員以為係刺蝟仔走甩咗，所以放咗入去？

你當飼養員傻㗎咩，人哋Pro㗎嘛，梗知呢隻係鮑魚刷啦～官方話，原來刺蝟仔對溫度好敏感㗎，所以唔可以成日出嚟拋頭露面，有時溫度唔啱嗰陣，咪搵住嚿鮑魚刷做替工頂住先囉！下？咁都得，真係創作力量同幻想會嚇你一跳呀！

其實刺蝟同鮑魚刷又真係幾似嘅，似到連刺蝟自己都以為撞到同鄉呀！可惜無論刺蝟仔幾努力嗲佢同Hi佢，同鄉都唔出嚟應佢呀。刺蝟仔呀刺蝟仔，你唔好咁傷心啦，人哋唔係想唔睬你㗎，但係作為一隻鮑魚刷，你叫人哋點應你先得㗎⋯⋯

封面圖片及資料來源：itmedia.jp、cutest_animal1／twitter