煲乾水嚟講，燒到個煲紅晒、甚至係燒到個煲好似嚿炭咁黑掹掹毛毛都見過，但好似今次呢位網民咁，個煲燒到融化毛毛就真係第一次見囉！事不宜遲，而家就等毛毛即刻帶大家睇下！

是咁的，話說早前有外國網民就話阿媽煮嘢食嘅時候淨係記得落材料，唔記得咗落水，跟住就直接開咗爐喎，結果咪搞到煲嘢乾燒咗成粒鐘囉！嗚哇，煲嘢乾燒咗成粒鐘，個煲入面啲材料變晒做黑炭就話意料之內啫，但點估到連個煲底都會燒到熔咗㗎啫⋯⋯

老老竇竇，乜煲都會熔到變成液體咁樣樣㗎咩？你個煲用鋁造㗎？嗱，呢位外國網民就話其實個煲係不鏽鋼煲嚟嘅，只不過個煲都差唔多用咗成廿年，可能就係因為用得耐，所以先會咁易燒熔啦（應該係，除非唔係）。

btw，呢位網民本身以為個爐會畀個煲搞到用唔到啦，點知又估唔到嚿嘢幾易清理，一剷就成塊起咗出嚟啵～最後，毛毛想贈天下間嘅地獄廚神一句⋯⋯愛惜生命，遠離廚房。

資料來源：BitterAnton／imgur