做宣傳呢家嘢，搞攤位遊戲送禮物是常識吧！最簡單咪臭係叫班妹豬weekend喺啲旺區度同啲路人甲乙丙玩下遊戲，然後派兩支茶，又派下雪糕（真係食得嗰啲呀！）咁囉～搞咁多嘢都係想多啲人支持自己公司啲Event啫～

送禮呢家嘢唔止喺香港先work㗎，喺其他國家都一樣得啫！最近有位日本網友就見到紅十字會搞咗個攤位做宣傳，話擲骰仔擲中特別點數就有嘢送喎～咁著數？有冇咁大隻蛤乸隨街跳呀！等毛毛呢個骰魔會一會你先！

原來係有日本洗衣粉送喎，咁就更加要9衝去玩下啦，咦，點解粒骰好似咁特別嘅？1個1，2個1，3個1⋯⋯開呀！六面都係1，咩玩法呀？分明出千啫！人嚟，攞嚿磚頭嚟！

其實大家都怪錯咗人喇，日本紅十字會都係想將掌門人嘅精神發揚光大啫～六面都係1咁咪唔使爭，打和啦（高八度）！Super！人人都有獎品咪皆大歡喜囉～

如果咁都仲要嘈嘅話，下次一於畀呢粒骰你擲，咁多個number，去到120都有，問你滿意未？Btw，擲骰呢條橋都唔錯喎，反正香港呢邊成日唔夠血，不如玩大啲，拎呢粒骰擲中某個數就有超級大獎，擲唔中就要即刻去捐血，咁咪有大把人衝去捐血囉！

封面圖片及資料來源：kun_machida／twitter