返工咁攰，搭車梗係要爭取時間補眠啦，不過唔係聽到巴士仔嘈暖到入心嘅溫馨提示就係聽到Jacky嘅管教腸胃對抗便秘嘅心得，又要數住出咗隧道第幾個站要落車，邊度會真係瞓得冧㗎，最多都係合埋眼休息㗎啫。

如果一個人喺車度一瞓醒嗰下竟然分唔到自己返緊公司定返緊屋企，你就知佢一定好攰喇；而台灣呢個後生女，仲要瞓到叫極都唔醒，就更加肯定係好很攰呀！話說佢坐喺座位度瞓嘅時候，已經半個身飛咗出通道，一掟彎就隨時跌佢出嚟咁㗎喇！

話口未完，佢真係成個身向前碌，打咗個大筋斗，完美落地。瞓到喺座位碌落地，真係第一次見，佢一定好痛喇陰公……

最令人睇到O晒嘴嘅係，佢竟然咁都仲未醒，繼續發緊好夢……呢個時候，司機叔叔都有掂一掂佢個鼻，睇下有冇呼吸，發現佢又冇斷氣，對眼擘大過一下又合返埋。死啦，佢會唔會其實唔係瞓著咗咁簡單，而係暈咗或者發生咩事㗎！都係call白車好啲喎！

救護員嚟到之後，終於都成功叫醒呢位睡公主喇，佢仲要大嗌咗幾聲，好似瞓瞓下覺畀人嘈醒要伸返個大懶腰咁！原來佢唔係有病又唔係飲醉咗，而係已經兩日冇瞓過覺，真係太攰先會瞓成咁……聽到呢度，真係覺得好心痛呀，唔知佢係因為返工定返學而chur到咁盡呢？巴士仔提提你：珍惜有得瞓嘅時間呀，唔通頂唔知身子弱呀！

封面圖片、資料來源連結：爆料公社、三立新聞